Isimangalo Sika-Thixo

(Isaiah i.)

(Ngu. W. W. G.)

UYehova uyathetha

Nani, ntlanga zomhlaba,

Umangele kulw'izulu,

Elo khaya liphezulu.

Bek'indlebe wena Zulu,

Wena khaya lobunyulu:

Ndimangalel'u"Akunani";

Ndideliwe ndinguMDali.

Olu sapho ndilondlile,

Ngoku lingoo-"Qelesile,"

Kanti ndizikhulisele,

Aba bantu ndizondlele.

Qhiphu kanye! abandazi,

Kwanekhaya abalazi,-

Kant'iiqwarha kwaneenkomo,

Ziyamazi umninizo.

Aba bantu baphelile

Bangoo "Zweliqhelesile"

Sebe kăkă-kamupetu,

Sebengenwe nazimpethu.

Sekuthamba ixhalanga;

Umphefumlo uyanuka,

Yhiloo ntshontsho, yeloo fuqa,

Yomphefumlo oneqgitha

Ndimangele kuwe mhlaba,-

Kuba nguwe umdlezana,

Owanyisa abantwana,

Sebebhede ama"dlaba."

Bayanuka, bathe bhutyu,

Mna, Yise, ndithe kruqu;

Ndibabiza ngamax'onke,

Ndibameme ngako konke.

Bazonele ngokwenene,

Umdlezana makaphuse;

Omalanga babalele,

Ze bachithwe naziimfazwe.

Bangalima baphandule,

Ngamakhuba baqandule,-

Ith'imvula ndiyibambe,

Imibethe ndiyivimbe.

Bangakhupha nemijelo,

Ndoyomisa imilambo;

Bangafuya oozimfuyo

Zozinkomo kuthi, "mho";

Noomahashe noozigusha;

Ozimali, nenciniba;

Ozibhokhwe neenqanawa;

Senditshilo,-Ziyatshaba

Sel'iNdim nje, omangele

Kule nkundla ndikhathele.

Ningabuyanga kwaphela,-

Senifile, kwa impela.

UngoWam umhlaba,

Noko ningoo"Bhed'idlaba."

Ndininike ngesi sisa;

Ndinenzela nindisola.

Ndonigxotha kulo mhlaba.

Ndinigxothe kwelaa khaya;

Isiphelo ke yhini na?

Singu-Athi! athi ke mna.

Zihlambeni zicoceni,

Obu bubi, bulahleni;

Khanipheze, nqumamani,

Ukwenz'ifa kufundeni.

phungulani imithwalo

Yabo babandezelweyo;

Gwebelani iinkedama,

Kufuneni ukugweba.

Nabo nabahlolokazi,

Ukuze bangasileli,-

Yenzani ubulungisa,

Xa niphethe ukugweba.

Khanize ke khe sixoxe.

NoYehova sidibene:

Nokwizono sekumrholo,-

UYehova sel'etshilo,-

Zobamhlophe ngokwekhephu,

Zibemhlophe njengomqhaphu,

Zibe weza, njengoboya

Buhlanjiwe obegusha.

Noth'ukuba ninemvume,

Okunye ke nilungile,

Ilungelo lalo mhlaba,

Ndoninika, nolixhamla.

Okanye ke nimangala,

Senibheda kwanedlaba,

Nakutshaba ngal'wikrele,-

UYehova uthethile.